Lihamu'a
Mahina fo'ou 'i Novema |
Ka honge 'ae fonua pea utu kovi 'ae ta'u, 'e
utu hake 'ae ta'u tokamu'a 'oku kei valevalea fau 'ae fanga ki'i fo'i 'ufi.
Na'e ui ia koe liha, 'a ia koe Liha-mu'a koe taimi 'oe 'uluaki to'u liha. |
Lihamui
Mahina fo'ou 'i Tisema |
Koe to'u liha eni ki mui, 'a ia koe liha mai
ia 'ae 'ufi na'e tokamui 'i he ta'u tokamu'a. |
Vaimu'a
Mahina fo'ou 'i Sanuali |
Neongo na'e 'uha 'ae mahina kotoa pe koe taimi
eni na'e to ai 'ae 'uha na'e mahu'inga taha ki hono fakafoha 'oe ta'u. |
Vaimui
Mahina fo'ou 'i Fepueli |
'I he ngaahi ta'u 'uho'uha na'e fa'a 'osi 'ae
mahina ko Vaimu'a 'oku kei 'uha pe. Na'e ui leva 'ae mahina hoko
ko Vaimui.
'I he ngaahi ta'u la'ala'a na'e fa'a toki to
pe 'ae 'uha ki Vaimui. Ka 'osi 'a Vai mo Vai 'oku te'eki pe to ha
'uha na'e lotu tavale leva 'ae kainga ki he ngaahi 'Otuamu'a he tokua kuo
mala'ia e fonua. |
Fakaafumo'ui
Mahina fo'ou 'i Ma'asi |
'Oku fakahingoa 'ae mahina ni ki he huli mo'ui
'ae ta'u. |
Fakaafumate
Mahina fo'ou 'i 'Epeleli |
Koe laumea eni 'ae ta'u ke mate. |
Hilingakelekele
Mahina fo'ou 'i Me |
Koe mahina utu ta'u eni. 'I he'ene a'u
mai ki he mahina ko eni kuo motu'a a'ua'u 'ae ma'ala 'ufi. Ko hono
utu 'oe 'ufi na'e keli 'o to'o ki 'olunga 'ae fo'i foha, kae tanu 'ae luo
ke fakafo'ipuke pea hili leva 'ae fo'i foha 'i 'olunga. Ka lava kotoa
hono utu na'e tanaki leva 'ae ngaahi fo'i 'ufi mei he ngaahi fo'ipuke 'o
fokotu'utaha pea 'ufi'ufi. Ko hono hili 'oe ngaahi fo'i 'ufi 'i he
ngaahi fo'ipuke koe hilingakelekele ia. |
Hilingamea'a
Mahina fo'ou 'i Sune |
Na'e tuku pe 'ae 'ufi 'i hono fokotu'utaha hili
hono utu kae 'oua kuo matu'u 'ae kelekele 'o ngangana ngofua mei hono kili.
Na'e 'ikai ha feinga ke mulumulu 'ae kelekele na'a mafohifohi 'ae sino'i
'ufi. Na'e toki fetuku leva 'ae 'ufi 'i he mahina ko eni 'o fokotu'u
ki hono palepale kuo ma'a lelei, 'a ia koe 'ave ia mei hono hilinga kelekele
ki hono hilinga me'a ma'a. |
'Ao'ao
Mahina fo'ou 'i Siulai |
Koe mahina eni na'e tofi ai 'ae pulopula 'oe
ta'ufo'ou pea fai ai 'ae fakavao 'oe feitu'u ma'ala. Na'e tofi 'ae
pulopula mei ha ngaahi fo'i 'ufi lelei ne tomu'a fili ke pulopula 'aki.
Koe fo'i pulopula kotoa pe na'e tofi na'e ma'u ai 'ae matatofi 'e ua pea
ui ia koe 'ao 'e ua. Ko e tupu'anga ia 'oe hingoa koe 'Ao'ao. |
Fu'ufu'unekinanga
Mahina fo'ou 'i 'Akosi |
Koe mahina eni na'e fai ai 'ae fakamaau, tafi,
moe tutu 'oe veve 'i he feitu'u ma'ala. Koe tanekinanga ia 'oe veve.
Na'e kamata leva hono tanu 'oe pulopula ki he ta'ufo'ou. |
Uluenga
Mahina fo'ou 'i Sepitema |
'I he a'u mai ki he mahina ni kuo holoholo 'ae
tanunga pulopula 'i he 'uho'uha. 'I he'ene pehe na'e fa'a enga 'ae
funga pulopula 'i he la'ala'a. |
Tanumanga
Mahina fo'ou 'i he konga ki mu'a 'o 'Okatopa |
Koe mahina eni na'e keli ai 'ae ta'ufo'ou.
'Oku ta'aki 'ae pulopula pea keli 'ae kelekele ke to fakalelei. Koe
pulopula na'e tuai hono ta'aki kae vave 'e ne tupu 'oku ta'aki 'o fakafale
kae 'oua ke lava keli fakalelei. 'Oku ui 'ae pulopula kuo ta'aki
'o fakafale koe tanumanga. |
'O'oamofangongo
Mahina fo'ou 'i he konga ki mui 'o 'Okatopa |
Koe taimi eni 'oe hongehonge pea moe fakapotopoto.
Ka fakalalahi 'ae honge na'e tufi fakaleli 'ae patepate'i 'ufi mei he ma'ala
ke tokonaki. Na'e fa'a tanaki pe ki he fangongo, 'a ia koe ngaahi
nge'esi pupu na'e laku holo he ma'ala 'ufi. Koe tupu'anga leva ia
'oe hingoa 'oe mahina ko hono 'oa 'aki e fangongo. |
..
...
...