Koe lea Tonga koe lea faka'ofo'ofa mo fakalata.
'Oku tau maheni ai ka 'i ai leva ha me'a faka'ofo'ofa, 'oku tau fa'a fakakaukau
pe fielau koe fa'ufa'u fakalelei 'e ha kau mataotao. Ka ko hono faka'ofo'ofa
mahulu ia 'oe lea Tonga ki he Tonga, na'e tupulaki hake pe ia 'i he mo'ui
moe feohi faka'aho 'ae Tonga. Pea ko hono fakalata 'oku toki e'a
mo'oni ia ka te ka nofo mama'o ha fonua muli pea 'ohovale pe kuo te fanongo
atu ki ha lea faka-Tonga.
Koe lea Tonga koe 'ataongo hoihoifua ia 'oe kakai
'o Tonga. 'Oku ne fakafofonga'i 'ae fiefia moe mamahi, faka'anaua
moe faka'aluma, tui moe 'ilo tukufakaholo 'etau fanga kui 'i he ngaahi
to'utangata kotoa pe ne nau mo'ui ai. Kuo ne tangi muimui mai eni
'i he'etau mo'ui faka'aho talu mei tuai. Pea 'oku kei hokohoko atu
pe 'ene tupulaki mo 'ene feliuaki 'i he'ene fakamatala'i 'ae anga 'oe vakai
'ae Tonga ki hono 'atakai.
'Ofa ke hokohoko pehe ai pe 'ae tupulaki 'ae lea
Tonga 'i he loto moe mo'ui faka'aho 'ae Tonga.
..