'Oku tanaki 'ae hiapo kuo amusi 'o tuku ke mae pea 'osi mo hono to'i kae toki hae.  'Oku hae faka'angataha pe 'ae sino'i hiapo 'e taha ke ma'u mei ai 'ae lau'i tutu loloa 'e taha.  'Oku fohi 'ae tu'a kili 'oe lau'i tutu ke ma'a pea tauaki ke momoa mo matu'u.  Hili ia 'oku fakatauhoa 'ae lau'i tutu ki he hoa'i tutu 'e hongofulu pe lau'i tutu e uofulu pea takai ia koe takainga tutu 'e taha.  'Oku ui 'ae takainga tutu 'e taha koe tekau.  Ko e tekau 'e hongofulu koe ta'anga tutu 'e taha. 

Koe naunau mahu'inga 'oku fiema'u ki he ngaue 'oku hoko koe tutua pea moe ike.  'Oku veteki 'ae takainga tutu 'o fola he funga tutua pea fakapaa (ta) 'aki 'ae faha'i 'oe ike 'oku tongitongi ke molu.  'Oku fulihi leva 'ae ike ki hono faha'i 'oku tokalelei 'o fakatokalelei 'aki.  'Oku tatala leva 'a e hoa'i tutu ke lo taha pea ui leva ia koe feta'aki.  'Oku pelupelu lalahi leva e feta'aki 'o tautau ke momoa.

'Oka momoa 'ae lou feta'aki 'oku to'o hifo 'o mutumutu (tu'utu'u) hono tapa mo hono mui ke tapatapa tatau.  Koe kongokonga feta'aki 'oku to'o he taimi mutumutu 'oku ui koe papanaki.  'Oku fakatahataha'i 'ae lou feta'aki 'oku lalahi tatau 'o tuku ki he 'aho koka'anga. 

'Oku kumi leva 'e he fefine koka'anga ha kupesi 'oku sai'ia ai ke kupesi 'aki 'e ne ngatu.  'Oku vau mai e koka pea fakataha'i tuitui 'o tatau.  'Oku fohi e kili'i tongo 'o fehu'i 'aki e koka moe tuitui kae 'oua kuo lanulanu lelei.  'Oku alea'i moe papa koka'anga moe fale kautaha ke fai ai 'ae koka'anga.  Pea kole mo ha kau fefine ke nau omi 'o tokoni ki he 'aho koka'anga.

'I he 'aho koka'anga 'oku fakapipiki 'ae kupesi ki he papa koka'anga.  'Oku fola pea hokohoko 'ae lau'i feta'aki 'i he funga kupesi kuo fakapipiki ki he papa koka'anga.  'Oku hokohoko 'aki 'ae lau'i feta'aki 'ae tou (manioke moho'ota).  'Oku lahi mo hono ngaue'aki 'oe mahoa'a (hu'ihu'i vai).  'Oku ua hono fakakalakalasi 'oe lau'i feta'aki 'i he taimi ko eni.  Koe lau'olunga koe ngaahi lau'i feta'aki lau lalahi pea 'oku li fakaloloa ia 'o fakataupotu ki he konga ki 'olunga 'oe ngatu.  Koe laulalo 'oku lau iiki pea 'oku li fakamaaukupu ia mei lalo 'o fakapipiki hifo 'aki 'ae lau'olunga.  'Oku vali 'aki leva e feta'aki 'ae koka kae 'oua kuo pipiki ('asi hake) 'ae fakatata oku ta 'i he kupesi.  'Oku teuteu ki ai moe me'atokoni koe faka'oho 'oe kau koka'anga.

Koe ola 'oe ngaue kuo lava koe ngatu ia.  Ko hono fua koe langanga.  Koe langanga 'e 50 koe ngatu ia 'e taha pea 'oku ui koe launima.  Koe langanga 'e 100 koe ngatu ia 'e ua pea ui koe lautefuhi. 

Koe fa'ahinga 'oe ngatu 'oku ua.  Koe Ngatu Ta Hina pea moe Ngatu 'Uli.  'Oku tatau pe hona founga ngaohi, hange ko ia 'oku fakamatala'i 'i 'olunga, ka 'oku kehe 'ae founga teuteu'i 'oe koka 'oe ngatu 'uli pea mo hono kupesi.  Vakai ki he peesi 'oe ngaahi kupesi.